Room ka mahaul ekdum badal gaya tha. Jaise hawa bhi ruk gayi ho.
Aanya aur Kabir dono chup the… par dono ne woh dekha tha—woh parchai… jo un dono ke haath pakadne par peeche hat gayi thi.
Kabir ne dheere se Aanya ka haath chhoda “Tumne bhi dekha na?” usne serious tone mein poocha.
Aanya ne haan mein sir hila diya “Yeh… normal nahi hai,” woh phusphusai
Kabir ne ek baar phir room ko scan kiya. Uski aankhon mein ab darr nahi tha… alertness thi. “Yeh tumse juda hua hai,” Kabir ne dheere se kaha
“Matlab?” Aanya ghabra gayi
“Jab tak main tumhe touch kar raha tha… woh peeche hat gaya”
Aanya ka dil aur tez dhadakne laga “Tum kehna kya chahte ho?”
Kabir ne seedha uski aankhon mein dekha— “Jo bhi hai… woh tumhe akela chahta hai”
Room ek second ke liye aur thanda ho gaya. Aanya ke haath thande pad gaye. “Yeh possible hi nahi hai…” woh dheere se boli.
Kabir kuch bolne hi wala tha— Tabhi… light flicker hui. Ek baar. Do baar. Aur phir… poora room andhere mein doob gaya.
Aanya ki saans atak gayi. “Stay close,” Kabir ki awaaz andhere mein gunji.
Usne turant Aanya ka haath pakad liya. Is baar Aanya ne mana nahi kiya. Usne uska haath aur zor se pakad liya.
Andhera itna gehra tha ki unhe ek dusre ka chehra tak nahi dikh raha tha.
Tabhi… Aanya ko apne doosre haath par kisi aur ka sparsh mehsoos hua. Thanda. Bohot thanda. Jaise barf. Aanya ka jism kaanp gaya.
“Ka… Kabir…” woh kaampte hue boli, “tumne mera doosra haath pakda hai?”
Kabir turant bola— “Main sirf ek haath pakde hue hoon.”
Aanya ka dil ruk gaya. Phir… yeh doosra haath kiska tha? Us thande sparsh ne dheere-dheere uski ungliyon ko zor se pakad liya. Jaise koi usey kheench raha ho.
“Leave her.” Kabir ki awaaz achanak sakht ho gayi.
Andhere mein uska tone bilkul badal chuka tha.
Aanya ko mehsoos hua jaise Kabir uske aur kareeb aa gaya ho. Aur phir— us thande haath ki pakad dheere-dheere dheeli padne lagi.
Ek second… Do second… Aur phir— woh gayab ho gaya.
Light wapas aa gayi. Room normal. Par Aanya ka chehra safed pad chuka tha.
Kabir ne turant uska haath chhoda aur uske face ko dekha. “Tum theek ho?”
Aanya kuch bol nahi paayi. Uski nazar dheere-dheere neeche gayi… uske haath par. Aur uski saanson ki awaaz tez ho gayi.
Uski wrist par… kaale ungliyon ke nishaan bane hue the. Jaise kisi ne usey zor se pakda ho.
Kabir ne bhi woh marks dekh liye. Uska jaw tight ho gaya. “Yeh koi illusion nahi hai,” usne dheere se kaha.
Aanya ki aankhon mein aansu aa gaye. “Yeh… mujhe chhod kyon nahi raha?”
Room phir se thoda thanda ho gaya. Aur is baar… deewar par ek halki si parchai ubhri. Bilkul shaant. Bilkul chup.
Par uska shape thoda sa jhuk kar… Aanya ki taraf badh raha tha.
Jaise woh keh raha ho— “Tum meri ho.”
Write a comment ...