Aanya apni wrist ko ghur rahi thi. Kaale ungliyon ke nishaan… bilkul saaf.
Jaise kisi ne usey zor se pakda ho.
“Yeh… yeh kaise ho sakta hai?” uski awaaz toot rahi thi. Kabir ne uska haath dheere se pakda.
Is baar uska touch aur zyada careful tha… jaise woh usey todna nahi chahta.
“Tum yahan safe nahi ho,” Kabir ne seedha kaha.
Aanya ne turant uski taraf dekha. “Safe? Matlab… tum keh rahe ho yeh sach hai?”
Kabir kuch seconds chup raha.
Phir dheere se bola— “Main keh raha hoon… tumhe jo lag raha hai, woh ignore mat karo.”
Room mein phir se wohi thandi hawa chalne lagi. Aanya ne apni ungliyan Kabir ke haath mein aur kas li.
“Yeh mujhe chhod kyon nahi raha…” woh dheere se boli.
Kabir ne uski aankhon mein dekha— “Kyuki shayad tumne ise kabhi bulaya tha.”
Aanya ka chehra ekdum se blank ho gaya. “Main? Main kyon bulaungi aisi cheez ko?”
Kabir ne jawab nahi diya. Usne sirf uski wrist par bane nishaan ko dekha… jaise woh kuch samajhne ki koshish kar raha ho.
Tabhi… room ke kone mein rakha hua sheesha halki si awaaz ke saath hil gaya.
Tik… Aanya aur Kabir dono ka dhyaan udhar gaya.
Sheesha bilkul seedha tha… par usme reflection thoda sa delay ho raha tha.
Aanya ne dheere se haath uthaya. Reflection ne ek second baad haath uthaya.
Aanya ka gala sukh gaya. “Tum dekh rahe ho na?” usne dheere se poocha.
Kabir ne haan mein sir hila diya.
Phir… reflection ne woh kiya jo Aanya ne nahi kiya. Usne muskuraaya.
Aanya ne turant apne hoth chhoo kar dekhe. Woh muskura nahi rahi thi.
Par sheeshe mein— uska reflection muskura raha tha.
Aanya ek kadam peeche hat gayi. “Yeh main nahi hoon…”
Reflection dheere-dheere apna sir jhukata hai. Jaise woh Aanya ko dhyan se dekh raha ho.
Aur phir… uske peeche wohi benaam saaya ubhar aata hai.
Is baar pehle se zyada clear.
Aur is baar… woh reflection ko nahi, seedha Aanya ko dekh raha tha.
Kabir turant Aanya ke saamne khada ho gaya. Jaise woh usse protect kar raha ho.
“Enough.” Kabir ki awaaz thodi sakht ho gayi.
Room ka temperature aur gir gaya. Sheesha achanak zor se crack ho gaya.
CRACK!
Aanya cheekh uthi. Reflection toot gaya. Hazaar tukdon mein.
Par har tukde mein— wahi saaya dikh raha tha.
Alag-alag angles se. Alag-alag shapes mein. Jaise woh har jagah ho.
Aanya ka saans lena mushkil ho gaya. “Yeh… yeh mujhe chhodta kyon nahi…” woh ro padi.
Room mein ek halki si sarsarahat hui.
Jaise koi dheere se chal raha ho.
Aur phir— Aanya ke kaan ke paas ek thandi si fiza ruk gayi.
Aur bina awaaz ke bhi ek ehsaas hua— “Kyuki tum meri ho.”
Kabir ne turant Aanya ka haath pakda. “Main hoon na,” usne dheere se kaha.
Aanya ne uski taraf dekha. Uski aankhon mein pehli baar darr ke saath… ek chhoti si umeed bhi thi.
Par deewar par ubharte hue saaye ne jaise us umeed ko dekh liya ho.
Woh dheere se hilta hai… aur aur bhi kareeb aa jata hai.
Jaise woh keh raha ho— “Main kahin nahi jaa raha.”
Write a comment ...