Aanya ne aankhein zor se bandh kar li. Sheeshe ke tukde ab bhi floor par bikhre pade the… har tukde mein wohi saaya, wohi andhera.
Kabir ne dheere se kaha, “Yahan rukna theek nahi hai. Chalo bahar chalte hain.”
Aanya ne haan mein sir hila diya.
Par jaise hi woh darwaze ki taraf badhi— uska sar achanak bhaari hone laga. Jaise kisi ne uske dimaag ko pakad liya ho.
“Aanya?” Kabir ne usse sambhala.
Par uski aankhon ke saamne sab kuch dheere-dheere blur hone laga. Room gayab… Kabir gayab…
Aur phir— ek naya scene. Andhera. Purana sa ghar. Barish ki tez awaaz.
Chhoti si Aanya… 7–8 saal ki…kone mein khadi kaanp rahi thi.
“Mat jao…” chhoti Aanya ki halki si awaaz goonji.
Par saamne koi nahi tha. Bas ek lambi si deewar… aur us par ek bada sa saaya.
Woh saaya dheere-dheere uske kareeb aaya. Chhoti Aanya ne apni aankhein band kar li.
“Please… mujhe akela mat chhodo…” Uski awaaz toot rahi thi.
Aur phir— us saaye ne apni shape badli. Jaise woh jhuk kar uske level par aa raha ho.
Aur bina awaaz ke bhi ek ehsaas hua— “Main yahin hoon.”
Chhoti Aanya ne dheere se aankhein kholi. Usne saamne dekha… Aur uska darr dheere-dheere kam hone laga. Jaise woh saaya usse dara nahi raha tha…usse sambhal raha tha.
“AANYA!” Kabir ki tez awaaz ne usse wapas kheench liya.
Aanya ne jhatke se aankhein kholi. Woh wapas apne room mein thi.
Kabir uske saamne jhuk kar uska chehra pakde hue tha. “Tum theek ho?” uski awaaz tension se bhari thi.
Aanya ki saansein tez chal rahi thi. “Main… maine kuch dekha…”
Kabir ne turant poocha— “Kya?”
Aanya ki aankhon mein confusion tha… aur darr bhi.
“Main… chhoti thi… aur woh saaya…” uski awaaz dheere-dheere kamzor ho gayi.
Kabir ne uski baat dhyan se suni.Uska chehra aur serious ho gaya.
“Tum usse pehle bhi mil chuki ho,” Kabir ne dheere se kaha.
Aanya ne shock mein uski taraf dekha. “Par mujhe kuch yaad nahi…”
Kabir ne gehri saans li. “Yaad nahi… ya tumne bhoolne ki koshish ki?”
Room phir se thoda thanda ho gaya. Jaise kisi ne unki baat sun li ho.
Aanya ne dheere se peeche dekha. Deewar par… ek saaya ubhar raha tha.
Is baar woh hil nahi raha tha. Bas khada tha. Shaant. Jaise woh sab kuch sun raha ho.
Kabir turant Aanya ke saamne aa gaya.
Par is baar— saaya peeche nahi hata. Woh wahi raha. Aur dheere-dheere uska shape badalne laga. Chhota. Aur chhota. Jaise woh kisi aur form mein aa raha ho.
Aanya ka dil zor se dhadakne laga. “Yeh… kya kar raha hai?”
Kabir ne dheere se kaha— “Yeh tumhe yaad dilana chahta hai.”
Saaya ab ek chhote bachche jaisa lag raha tha. Bilkul us flashback jaisa.
Aur phir— usne apna haath uthaya. Seedha Aanya ki taraf. Jaise woh usey bula raha ho. Aanya ek kadam aage badhne lagi.
“Kya tumhe yaad hai…?” uske dimaag mein ek awaaz goonji.
Kabir ne turant uska haath pakda. “Don’t.”
Aanya ruk gayi. Par uski aankhon mein aansu aa gaye.
“Woh… mujhe dara nahi raha tha…”
Kabir ne uski taraf dekha. “Phir kya kar raha tha?”
Aanya ki awaaz bilkul halki thi— “Woh… mere saath tha…”
Room mein phir se wohi sarsarahat goonji. Aur saaya dheere se apni asli shape mein wapas aane laga.
Lamba… andhera… be-naam. Jaise woh keh raha ho— “Main kabhi gaya hi nahi tha.”
To be continued....
Write a comment ...