Room mein khamoshi chipak si gayi thi. Aanya bilkul beech mein khadi thi. Ek taraf Kabir. Dusri taraf deewar par failta hua woh andhera. Aur dono… uska intezaar kar rahe the.
Kabir ne dheere se uska haath pakda. “Aanya, meri taraf dekho.”
Uski awaaz calm thi… par uske andar tension saaf mehsoos ho rahi thi. “Yeh cheez tumhare dimaag ke saath khel rahi hai. Jitna tum isse sunogi, utna yeh strong hota jayega.”
Aanya ne uski taraf dekha. Kabir ki aankhon mein darr nahi tha. Sirf concern. Sirf… uske liye fikr.
Par phir— deewar par saaya aur gehra ho gaya. Room ki light uske aas-paas dheere-dheere dim hone lagi.
Aur phir woh awaaz— “Woh tumhe samajhta nahi…”
Aanya ka saans atak gaya. Kabir ne turant uska chehra apni taraf mod diya. “Uski taraf mat dekho.”
Par Aanya ne mehsoos kiya— saaya gussa nahi tha. Dukhi tha. Jaise woh sach mein akela ho.
“Tum mujhe kyon nahi chhod dete…” Aanya ki aankhon mein aansu aa gaye.
Room mein thandi hawa chalne lagi.
Aur phir— “Kyuki tumne kaha tha… rukne ko.”
Flashback
Baarish. Chhoti Aanya ka rota hua chehra. “Please… mujhe akela mat chhodo…”
Aanya ne apna sir pakad liya. “Bas… bas!”
Kabir ne turant usse sambhala. “Aanya, meri taraf dekho. Breathe.”
Uska touch warm tha. Real. Aur dheere-dheere Aanya ki saansein normal hone lagi.
Kabir ne uske baal peeche kiye. “Main hoon yahan।”
Aanya ne dheere se uski shirt pakad li. Us pal mein… usey sirf Kabir safe laga.
Aur shayad— saaye ne yeh dekh liya. Room ki khidki achanak zor se khul gayi.
BANG!
Thandi hawa andar ghus aayi. Lights flicker hone lagi. Kabir turant Aanya ke saamne aa gaya.
“Enough!” Uski awaaz pehli baar itni loud hui thi.
Deewar par saaya violently hilne laga. Jaise woh control lose kar raha ho. Aanya ka dil zor se dhadakne laga.
Aur phir— saaya dheere-dheere floor se uth kar… Kabir ke peeche khada ho gaya.
Aanya ki aankhein phail gayi. “Kabir… peeche…”
Kabir mudne hi wala tha— tabhi saaya uske bilkul kareeb jhuk gaya. Aur bina awaaz ke bhi ek ehsaas room mein goonj gaya—
“Woh tumhe mujhse cheen raha hai.”
Agla second— Kabir ka body achanak freeze ho gaya. Uski saansein ruk si gayi.
“Aah—” Woh apne seene ko pakad kar neeche gir gaya.
“KABIR!” Aanya daud kar uske paas gayi.
Kabir ka chehra safed pad chuka tha. Jaise uski body se saari warmth kheench li gayi ho.
Aanya ki aankhon se aansu girne lage. “Please… please usse hurt mat karo…”
Room ek second ke liye silent ho gaya. Saaya dheere se Aanya ke paas aaya. Is baar darr kam tha… presence zyada.
Aur phir— uski wrist par kisi thandi ungli ka halka sa touch mehsoos hua.
“Phir usse chhod do.”
Aanya ka dil toot sa gaya. Usne Kabir ko dekha… phir us andhere ko. Aur pehli baar— usse samajh aaya. Yeh sirf haunting nahi thi. Yeh obsession tha.
Aur woh obsession… Kabir ko zinda nahi chhodne wala tha.
Write a comment ...